नारायणगढ–मुग्लिन सडकखण्डमा २५ स्थानमा पहिरोको जोखिम रहेको भरतपुरस्थित डिभिजन सडक कार्यालयले जनाएको छ। तीमध्ये चार स्थान—मौरी पुल, नाम्सी पुल, कालीखोला, र तुइन पुल उच्च जोखिममा छन्। सात स्थान कम जोखिममा छन्।

नाम्सी, कालीखोला, र तुइन पुलमा पहिरो नियन्त्रण गर्न ५२ करोड रुपैयाँ खर्च हुने अनुमान गरिएको छ। ‘स्लोप स्टेवलाइजेसन’ र ‘रक नेटिङ’को काम गर्नुपर्नेछ। कम जोखिम भएका गाईघाट, डुम्रे पुल, घुमाउने, सिमलताल, जलवीरे, र पाँच किलोमा पनि व्यवस्थापन आवश्यक छ।

पानी परेपछि भूक्षयको जोखिम रहेकाले सेतीदोभान, मौरी पुल, र चार किलोमा उपकरण तयार राखिने छ। हेटौँडास्थित हेवी इक्युप्मेन्ट डिभिजन र डुम्रेको यान्त्रिक कार्यालयबाट उपकरणको प्रबन्ध गरिनेछ।

केराबारीमा नेचरबेस सोलुसन नामक संस्थाले बायो इन्जिनियरिङ प्रविधिबाट पहिरो नियन्त्रणको अध्ययन गरिरहेको छ। खहरेखोला, भतेरीको ओरालो, गाईघाट, सेतीदोभान, जलवीरे, २६ किलो, र चार किलो क्षेत्रका ११ ठाउँमा अध्ययन गर्न संस्थाले सडक विभागलाई पत्राचार गरेको छ।

०८० र ०७९ सालमा पटक-पटक भूक्षय हुँदा सवारी आवागमन अवरुद्ध भएको थियो। भविष्यमा यो जोखिमलाई कम गर्न अध्ययन र व्यवस्थापनको काम भइरहेको छ।