काठमाडौं: काठमाडौं महानगरपालिकाले आफ्नो क्षेत्रभित्रका सबै सार्वजनिक शौचालयहरु निःशुल्क सञ्चालनमा ल्याउने तयारी गरेको छ। महानगरले आज एक सूचना जारी गर्दै यो व्यवस्था १५ दिनपछि पूर्णरुपमा कार्यान्वयनमा ल्याउने जानकारी दिएको छ।
महानगरपालिकाले सेवाग्राहीसँग शुल्क लिई सञ्चालन गरिरहेका सार्वजनिक शौचालयका सञ्चालक र व्यवस्थापकहरुलाई आज जेठ १८ गतेदेखि १५ दिनभित्र सार्वजनिक निजी साझेदारी एकाइमा लिखित प्रस्ताव पेश गर्न आग्रह गरेको छ। त्यसपछि महानगरपालिका भित्रका सबै सार्वजनिक शौचालयहरु निःशुल्क सञ्चालन गर्नुपर्ने व्यवस्था लागू हुनेछ।
यस्तै, महानगरपालिकाले सूचना विपरीत सार्वजनिक शौचालय प्रयोग बापत कुनै प्रकारको शुल्क असुल गरेमा प्रचलित कानुन बमोजिम कारबाही गर्ने चेतावनी दिएको छ। यो कदमले सर्वसाधारणलाई सुविधाजनक र निःशुल्क शौचालय सेवा उपलब्ध गराउने महानगरको प्रयासलाई थप बलियो बनाउने विश्वास लिइएको छ।
महानगरपालिकाको यो निर्णयले स्वच्छता र स्वास्थ्यमा सुधार ल्याउन महत्वपूर्ण भूमिका खेल्नेछ। सार्वजनिक शौचालयको निःशुल्क प्रयोगले सर्वसाधारणको दैनिक जीवनलाई सहज बनाउने र स्वास्थ्य सुरक्षामा योगदान पुर्याउने अपेक्षा गरिएको छ।
