गुल्मीमा सोमबार बिहान जीप दुर्घटनामा एक जनाको मृत्यु भएको छ भने सात जना घाइते भएका छन्। सत्यवती गाउँपालिका-८ की ३२ वर्षीया कमला बुढाथोकीको मृत्यु भएको हो। कालिगण्डकी गाउँपालिका-४ ओक्याङस्थित कच्ची सडकमा चन्द्रकोटबाट पूर्तिघाटतर्फ जाँदै गरेको बलेरो डबल क्याप गाडी अनियन्त्रित भई सडकदेखि ४०० मिटर तल खसेको थियो। जीपमा आठ जना सवार थिए।
घाइतेमध्ये चार जनाको अवस्था गम्भीर छ र सबैलाई थप उपचारका लागि पाल्पा पठाइएको छ। दुर्घटनाबारे अनुसन्धान र उद्धारका लागि पूर्तिघाट प्रहरी चौकीबाट टोली खटाइएको छ।
