तत्कालीन राजा वीरेन्द्र शाहको वंश नास हुने गरी नारायणहिटी दरबार हत्याकाण्ड भएको आज २३ वर्ष पूरा भएको छ। २०५८ जेठ १९ गते भएको यस हत्याकाण्डमा राजा वीरेन्द्र शाहको वंश नै नास भएको थियो।
राजदरबारभित्र भएको यस गोलीकाण्डमा राजा वीरेन्द्र, रानी ऐश्वर्य, युवराज दीपेन्द्र, अधिराजकुमार नीराजन, राजकुमारी श्रुति, शान्ति राज्यलक्ष्मी सिंह, शारदा राज्यलक्ष्मी शाह, शाहज्यादी जयन्ती राज्यलक्ष्मी शाह, कुमार खड्गविक्रम शाह र धीरेन्द्र शाहको मृत्यु भएको थियो। घटनामा कोमल शाह, शोभा शाही, कुमार गोरखशमशेर र केतकी चेस्टर घाइते भएका थिए।
यस हत्याकाण्डले २३ वर्ष बितिसक्दा पनि रहस्यमयताको गर्भमै रहेको छ। त्यसबेला सर्वोच्च अदालतका न्यायाधीश केशवप्रसाद उपाध्याय र सभामुख तारानाथ रानाभाट रहेको उच्चस्तरीय छानबिन समितिले युवराज दीपेन्द्रलाई दोषी ठहर्याए पनि त्यसलाई आमजनताले विश्वास गरेका छैनन्। तत्कालीन छानबिन समितिले युवराज दीपेन्द्रले हत्या गरेको भनी अपुष्ट तथ्य सार्वजनिक गरेको थियो।
छानबिन समितिको तथ्यअनुसार युवराज दीपेन्द्रले नै राजा वीरेन्द्रको वंश नाश गरेको मानिन्छ। तर, उक्त प्रतिवेदनको दाबीलाई धेरैले विश्वास नगरेको पाइन्छ। सत्तामा पुगेका नेताहरूले बाहिर बस्दा दरबार हत्याकाण्डको रहस्य पत्ता लगाउने वाचा गरे पनि पदमा पुगेपछि तिनको प्राथमिकतामा कहिल्यै परेको देखिँदैन।
यो घटनाले नेपालका जनतामा ठूलो आघात पुर्याएको थियो र आजसम्म पनि यसको रहस्य उजागर हुन सकेको छैन। दरबार हत्याकाण्डको वास्तविकता पत्ता लगाउन र दोषीलाई कारबाही गर्नका लागि अझै पनि ठोस कदम चालिएको छैन। यो घटनाले नेपालको इतिहासमा गहिरो छाप छोडेको छ र यसको छानबिन र सत्यतथ्य उजागर गर्ने माग निरन्तर उठिरहेको छ।
