प्रधानमन्त्री एवं नेकपा एमालेका अध्यक्ष केपी शर्मा ओलीले पार्टीका नेता र कार्यकर्तालाई गुटबन्दी नगर्न र निष्ठापूर्वक पार्टीको पक्षमा काम गर्न निर्देशन दिएका छन्। आइतबार एमाले मुख्यालय च्यासलमा आयोजित पार्टी प्रवेश कार्यक्रममा प्रधानमन्त्री ओलीले पार्टीभित्रको एकता र अनुशासनको महत्त्वमा जोड दिंदै, गुटबन्दीबाट पार्टी कमजोर हुने भन्दै सतर्क रहन आग्रह गरे।
प्रधानमन्त्री ओलीले पार्टीको नीति, विचार, र कार्यक्रमहरू सही रहेको बताउँदै, त्यही अनुसार इमान्दारिताका साथ काम गर्नुपर्नेमा जोड दिए। उनले भने, “गुटबन्दी गरेर, पक्ष-विपक्ष गरेर, जालझेल गरेर कोही पनि सफल हुँदैन। हामीले साना-साना कुरामा अल्झिने होइन, वृहत्तर अभ्यास गर्नुपर्छ।”
उनले एमालेले देश र जनताको पक्षमा ठूला सफलताहरू हासिल गर्दै आएको उल्लेख गर्दै, भविष्यमा पनि यस्तै सफलता कायम राख्नुपर्ने बताए। ओलीले पार्टीभित्र देखिएका केही गलत प्रवृत्तिहरूलाई नफैलिन दिन आग्रह गर्दै, गुटबन्दीबाट टाढा रहन र पार्टीको पक्षमा दृढताका साथ उभिन निर्देशन दिए।
प्रधानमन्त्री ओलीले एमालेमा प्रवेश गर्ने नयाँ सदस्यहरूलाई पनि इमान्दारिताका साथ काम गर्न आग्रह गरे। उनले पार्टीलाई थप सफल बनाउन सबै कार्यकर्ताहरूले अनुशासन र एकता कायम राख्नुपर्ने र व्यक्तिगत स्वार्थभन्दा माथि उठेर काम गर्नुपर्ने धारणा व्यक्त गरे।
यस अवसरमा प्रधानमन्त्री ओलीले पार्टीको दीर्घकालीन सफलता र स्थिरताको लागि सबै नेता र कार्यकर्तालाई एकताबद्ध भएर अघि बढ्न आह्वान गरे।
