काठमाडौँस्थित बाग्मती नदी (गौरीघाट जल मापन केन्द्र)मा जलसतहले सतर्कता तह पार गरेको छ। जल तथा मौसम विज्ञान विभागले आज साँझ ५:३० बजे जल सतहले सतर्कता तह पार गरेको जानकारी दिएको हो।

बाढी बढ्दो क्रममा रहेकाले बाग्मती, मनोहरा दोभानसम्मको तटीय क्षेत्रहरूका बासिन्दालाई उच्च सतर्कता अपनाउन अनुरोध गरिएको छ।

मकवानपुरमा भारी वर्षा

पछिल्लो ३ घण्टामा मकवानपुरमा भारी वर्षा मापन भएको छ। मकवानपुरगढी वर्षा मापन केन्द्र र आसपासको क्षेत्रमा मध्यमदेखि भारी वर्षा मापन भएपछि बाढी सूचना केन्द्रले सतर्कता अपनाउन आग्रह गरेको छ। सो क्षेत्र हुँदै बहने लालबकैया खोलासहित अन्य ससाना खोलाको बहाव बढ्दो क्रममा रहेको भन्दै केन्द्रले तटीय क्षेत्रका बासिन्दालाई उच्च सतर्कता अपनाउन भनेको छ।

आगामी तीन दिनको पूर्वानुमान

केन्द्रले आगामी तीन दिन कोशी, नारायणी, कर्णाली, महाकाली र यसका प्रमुख सहायक नदीहरूमा जलसतह बढ्ने जनाएको छ। यस अवधिमा कास्की, लमजुङ, बझाङ, दार्चुला र आसपासका जिल्ला हुँदै बहने नदीहरूमा आकस्मिक बाढीको मध्यम जोखिम रहेको केन्द्रले चेतावनी दिएको छ।

भक्तपुरस्थित हनुमन्ते खोलामा पनि सतर्कता तह पार

भक्तपुरस्थित हनुमन्ते खोलाले पनि सतर्कता तह पार गरेकोले विभागको बाढी पूर्वानुमान महाशाखाले सावधानी अपनाउन अनुरोध गरेको छ।

महत्वपूर्ण जानकारी:

सावधानी अपनाउन र आवश्यक तयारी गर्न आग्रह गरिन्छ। तटीय क्षेत्रका बासिन्दाहरूले विशेष सतर्कता अपनाउन आवश्यक छ।