रुकुम पश्चिमको मुसिकोट नगरपालिका वडा नं २ स्थित पशुपति माध्यामिक विद्यालय रातामाटाले आफ्नो ५९ औं वार्षिकोत्सव मनाएको छ। यस अवसरमा विद्यालयकी पूर्व विद्यार्थी सिर्जना शर्माले आफ्ना पिता नारायणप्रसाद शर्माको सम्मान र माता स्वर्गीय त्रिपुरादेवीको सम्झनामा “सिनात्रि अक्षयकोष २०८१” नामक एक लाख एक हजार एक सय एघार रुपैयाँको अक्षयकोष स्थापना गरेकी छिन्।
यो कोषबाट प्रत्येक वर्ष एसईई परीक्षामा उत्कृष्ट अंक ल्याउने एक छात्र, एक छात्रा, र मुसिकोट नगरपालिकाभित्रका एक उत्कृष्ट शिक्षकलाई पुरस्कृत गरिनेछ। अक्षयकोष वापतको रकम विद्यालयका प्रधानाध्यापक घनश्याम बुढाथोकीलाई नारायणप्रसाद शर्माले हस्तान्तरण गरेका थिए।
सिर्जना शर्माले विद्यालयको पुस्तकालयका लागि ५० थान पुस्तक पनि प्रदान गरेकी छिन्। शिक्षक दामोदर शर्माले यो जानकारी दिएका छन्। विद्यालयले २०२२ सालमा स्थापना भई विभिन्न कार्यक्रम गरी यो वार्षिकोत्सव मनाएको हो।
