ग्लोबल छनोटअघि नेपालको सानदार कमब्याक: सम्झना र पूजा चम्किएपछि अमेरिका स्तब्ध
काठमाडौँ, पुस ७ : घरेलु मैदानमा आयोजना हुन लागेको आईसीसी महिला टी–२० विश्वकप ग्लोबल छनोटअघि नेपाली महिला राष्ट्रिय क्रिकेट टोलीले अन्तिम अभ्यास खेलमा रोमाञ्चक जित हात पारेको छ। यसअघिका लगातार दुई खेलमा पराजय भोगेको नेपालले आइतबार अमेरिकालाई ४ विकेटले स्तब्ध पार्दै लयमा फर्किएको संकेत दिएको हो।
रोमाञ्चक रन चेज र सम्झना–पूजाको साझेदारी मूलपानी क्रिकेट मैदानमा अमेरिकाले दिएको १ सय ५८ रनको चुनौतीपूर्ण लक्ष्य नेपालले १ बल बाँकी रहँदै ६ विकेटको क्षतिमा पूरा गर्यो। नेपालको जितका प्रमुख आधार सम्झना खड्का र पूजा महतो बने। सम्झनाले अविजित ४९ रनको आक्रामक इनिङ्स खेलिन् भने पूजाले पनि ४३ रनको महत्वपूर्ण अविजित योगदान दिइन्। मध्यक्रममा काजल श्रेष्ठले २८ र कविता जोशीले १२ रन थपेपछि नेपालले लक्ष्यमा पुग्न सफल भयो।
अमेरिकाका लागि तारा नोरिस र लेखा शेट्टीले २–२ विकेट लिए पनि नेपाली ब्याटरहरूलाई रोक्न सकेनन्।
पहिलो इनिङ्स: अमेरिकाको मध्यम योगफल यसअघि टस जितेर पहिले ब्याटिङ रोजेको अमेरिकाले निर्धारित २० ओभरमा ७ विकेट गुमाउँदै १ सय ५७ रन जोडेको थियो। अमेरिकाका लागि एला क्लारिजले सर्वाधिक ३९ रन र पूजा गनेसले २२ रन जोडिन्। नेपाली बलिङतर्फ मनिषा उपाध्यायले उत्कृष्ट प्रदर्शन गर्दै २ विकेट झारिन् भने कविता कुँवर, कविता जोशी, रिया शर्मा र रचना चौधरीले १–१ विकेट लिए।
ग्लोबल छनोटको बाटो: विश्वकपको लक्ष्य नेपालले यसअघिका अभ्यास खेलमा स्कटल्याण्डसँग २७ रन र पहिलो खेलमा अमेरिकासँग ८ विकेटले हार बेहोरेको थियो। अन्तिम खेलमा अमेरिकासँगको यो जितले नेपाली खेलाडीको मनोबल उच्च बनाएको छ।
आगामी माघ ४ गतेदेखि नेपालमै सुरु हुने ग्लोबल क्वालिफायरमा १० राष्ट्र सहभागी हुँदैछन्। तीमध्ये शीर्ष चार टोलीले सन् २०२६ को जुन महिनामा इङ्गल्याण्डमा हुने महिला टी–२० विश्वकपमा स्थान सुरक्षित गर्नेछन्। नेपालले समूह चरणका सबै खेलहरू कीर्तिपुरस्थित त्रिवि क्रिकेट मैदानमा खेल्ने तालिका रहेको छ।
