आजबाट सुदूरपश्चिम प्रदेश सरकार बजेट शून्यतामा गएको छ। गत असार १ गते सार्वजनिक भएको आगामी आर्थिक वर्ष ०८१-८२ को विनियोजित बजेट प्रदेश सभाबाट पास नहुँदा सरकार बजेट होलिडेतर्फ पुगेको हो।
मुख्यमन्त्री दीर्घ सोडारी नेतृत्वको सरकार अहिले अल्पमतमा परेको छ। २० असारमा एमालेले समर्थन फिर्ता लिएपछि सोडारी सरकार अल्पमतमा पुगेको हो। एमालेका आर्थिक मामिला मन्त्री सुरेन्द्रबहादुर पाल, आन्तरिक मामिला मन्त्री हिरा सार्की, र वन, वातावरण तथा सहकारी मन्त्री वीरबहादुर थापाले राजीनामा दिएका थिए।
प्रमुख राजनैतिक दलहरूको सुझाव
तीन प्रमुख राजनैतिक दलले असार २९ गते पत्रकार सम्मेलन गरेर अल्पमतमा परेका मुख्यमन्त्री सोडारीलाई राजीनामा दिन आग्रह गरेका थिए। कांग्रेस, एमाले र नागरिक उन्मुक्ति पार्टीका नेताहरूले राजीनामा दिएर मार्ग प्रशस्त गर्न आग्रह गरेका थिए।
बजेट पास नहुँदा शून्यताको अवस्था
असार १ गते आर्थिक मामिला मन्त्री सुरेन्द्रबहादुर पालले ३१ अर्ब ६२ करोड ९८ लाख २८ हजारको बजेट पेस गरेका थिए। तर, उक्त बजेटमा असार मसान्तसम्म छलफल नै हुन सकेन। असार मसान्तको राति १२ बजेसम्म बजेट पास हुनुपर्ने संवैधानिक प्रावधान छ। तर, यो समयसम्म बजेट पास नभएपछि बजेट शून्यताको अवस्था सिर्जना भएको हो।
मुख्यमन्त्री सोडारीको प्रतिक्रिया
मुख्यमन्त्री सोडारीले सत्ता छाड्ने संकेत गरेका छैनन्। उनले विश्वासको मत लिन संवैधानिक रुपमा ३० दिनको समय रहेको बताउँदै साउन १९ गतेसम्म सरकार चलाएर राजीनामा दिने संकेत गरेका छन्।
आर्थिक मामिला मन्त्री अक्कलबहादुर रावलको टिप्पणी
आर्थिक मामिला मन्त्री अक्कलबहादुर रावलले एमालेले सहयोग नगरेका कारण बजेट पास हुन नसकेको बताएका छन्। उनले प्रदेश प्रमुखले सदन अन्त्य गरिदिएमा अध्यादेशबाट बजेट ल्याउने तयारीमा रहेको रावलले बताएका छन्।
मुख्यमन्त्री सोडारीले राजीनामा दिन नचाहेको र विश्वासको मतको सामना गर्न तयार रहेको बताएका छन्। यदि मुख्यमन्त्रीले राजीनामा दिए पनि अन्तिम दिन मात्रै दिने बताएका छन्।
