भारतका प्रधानमन्त्री नरेन्द्र मोदी तेस्रो कार्यकालका लागि प्रधानमन्त्री बनेपछि पहिलो विदेश भ्रमणका रुपमा दुई दिने रुस भ्रमणमा छन्। यसअघि छिमेकी राष्ट्रको भ्रमणलाई प्राथमिकतामा राखेका मोदीले यसपटक रुसलाई आफ्नो गन्तव्य बनाएका हुन्। रुस-युक्रेन युद्ध सुरु भएपछि पहिलो पटक मोदी रुस गएका हुन् र उनी आजसम्म रुसमा रहनेछन्।
राष्ट्रपति भ्लादिमिर पुटिनको निम्तोमा २२औँ भारत–रुस शिखर सम्मेलनमा भाग लिन मोदी रुस पुगेका हुन्। पछिल्ला तीन वर्षयता दुवै देशबीच कुनै दुईपक्षीय औपचारिक वार्ता भएको थिएन। दुई शक्तिशाली नेताबीचको यस भेटघाटले दुई देशको मैत्रीपूर्ण सम्बन्धलाई अझै प्रगाढ बनाउने, अन्तर्राष्ट्रिय तथा क्षेत्रीय मुद्दालाई स्थायित्व दिन छलफल हुने रुसले जनाएको छ।
यस भ्रमणमा उर्जा र व्यापारका क्षेत्रमा पनि छलफल भएको रुसी सञ्चारमाध्यम तासले जनाएको छ। मोदीले रुसमा रहेका भारतीय समुदायसँग पनि भेटवार्ता गरेका छन्।
मोदीलाई मस्को विमानस्थलमा रुसी सेनाको एक टुकडीले गार्ड अफ अनर प्रदान गरेको थियो। रुस भ्रमणपछि मोदी आज अष्ट्रिया प्रस्थान गर्नेछन्।
