रवि र कुलमानको ‘इगो क्लास’: वैकल्पिक शक्तिको एकतामा कसरी लाग्यो पूर्णविराम?

काठमाडौँ : पुस २६, २०८२ – नेपाली राजनीतिमा ‘आशाका किरण’ मानिएका रवि लामिछाने र कुलमान घिसिङबीचको सम्बन्धमा आएको तीव्र चिसोपनाले अन्ततः राजनीतिक मोड लिएको छ। पुस १४ गते तामझामका साथ गरिएको ७ बुँदे सहमति केवल १२ दिनमै कागजको खोस्टोमा परिणत भएको छ।

किन बिग्रियो सम्बन्ध?

स्रोतका अनुसार रवि लामिछाने र कुलमान घिसिङबीचको सम्बन्ध बिग्रनुको मुख्य जड ‘शक्ति बाँडफाँड र मर्यादाक्रम’ हो। रास्वपा सभापति रवि लामिछानेले कुलमानलाई ‘वरिष्ठ उपाध्यक्ष’ वा ‘सह-अध्यक्ष’ को प्रस्ताव गरेका थिए, तर कुलमान घिसिङले पार्टीको नीति निर्माणमा बराबरीको हैसियत र समानुपातिक सूचीमा आफ्ना मान्छेहरूको सम्मानजनक उपस्थितिको अडान राखेका थिए।

लामिछानेले पार्टीको संरचना र ‘घण्टी’ चुनाव चिह्नमा कुनै सम्झौता नगर्ने अडान लिएपछि कुलमान चिढिएका हुन्। “हामीले उज्यालो दिएका छौँ, हामी कसैको छायामा बस्न आएका होइनौँ,” कुलमान निकट एक नेताले बताए।

बालेन शाहको मध्यस्थता असफल

काठमाडौँका मेयर बालेन शाहले यी दुई शक्तिलाई मिलाउन निकै कसरत गरेका थिए। तर, रास्वपाले बालेनलाई ‘भावी प्रधानमन्त्री’ का रूपमा अघि सार्ने प्रस्ताव गरे पनि कुलमानलाई भने ओझेलमा पार्न खोजेको आरोप उज्यालो नेपाल पार्टीको छ। शनिबार बिहान भएको अन्तिम चरणको वार्तामा रवि लामिछाने र कुलमान घिसिङबीच भनाभन नै भएको र कुलमान बैठक छाडेर हिँडेको समाचार बाहिरिएको छ। यससँगै अब आगामी निर्वाचनमा यी दुई शक्ति आमने-सामने हुने निश्चित भएको छ।