इंग्लिस प्रिमियर लिग फुटबलमा म्यानचेस्टर सिटीको प्रभावशाली जित
इंग्लिस प्रिमियर लिग फुटबलमा साविक विजेता म्यानचेस्टर सिटीले वेस्टह्यामलाई ३–१ गोलले हराउँदै आफ्नो अपराजित यात्रा कायम राखेको छ। गएरातिको खेलमा सिटीका स्टार खेलाडी एर्लिङ्ग हालान्डले उत्कृष्ट प्रदर्शन गर्दै ह्याट्रिक पूरा गरे। उनले खेलको १०औं, ३०औं, र ८३औं मिनेटमा गोल गर्दै टिमलाई सानदार जित दिलाए। वेस्टह्यामले खेलको १९औं मिनेटमा उपहार गोल पाएको थियो, तर त्यसलाई टिकाउन सकेन।
जितसँगै सिटी ३ खेलमा ९ अङ्कसहित शीर्ष स्थानमा छ। हिजोको अर्को खेलमा, आर्सनलले सुरुआती अग्रता राख्न नसक्दा ब्राइटनसँग १–१ गोलको बराबरीमा रोकिएको छ। यस बराबरीसँगै ब्राइटन तीन खेलमा सात अङ्कसहित दोस्रो स्थानमा छ भने आर्सनल पनि समान सात अङ्कसहित तेस्रो स्थानमा रहेको छ।
अन्य खेलहरूमा:
- ब्रेन्टफोर्डले साउथह्याम्पटनलाई ३–१ गोलले पराजित गर्यो।
- बर्नमाउथले एभर्टनलाई ३–२ गोलले हरायो।
- एस्टन भिल्लाले लेस्टर सिटीलाई २–१ गोलले पराजित गर्यो।
- नटिङघम फरेस्ट र उल्भ्स, इपस्वीच टाउन र फुलहमले एक÷एक गोलको बराबरी खेल्दै अङ्क बाँडे।
आजका खेलहरू:
- चेल्सी र क्रिस्टल प्यालेस
- न्यूक्यासल र टोटनहम
- म्यानचेस्टर यूनाइटेड र लिभरपुल
आजका खेलहरूले लिगको अंक तालिकामा थप रोचक मोड ल्याउने अपेक्षा गरिएको छ।
