सुडानको डार्फर राज्यको राजधानी एलफशरमा विद्रोही अर्धसैनिक समूह र्यापिड सपोर्ट फोर्स (आरएसएफ) ले गरेको आक्रमणमा कम्तीमा २३ जनाको ज्यान गएको छ भने ६० भन्दा बढी घाइते भएका छन्।
चिनियाँ समाचार संस्था सिन्ह्वाका अनुसार, आरएसएफले जानाजान सर्वसाधारणलाई लक्षित गरेर स्वास्थ्य चौकीमा रकेट प्रहार गर्दा यी मानिसहरूको ज्यान गएको हो। एलफशरको दक्षिणी भागमा सरकारी उपस्थिति नदेखिएकाले सुडानको आधिकारिक सरकारले यसबारे कुनै टिप्पणी सार्वजनिक गरेको छैन।
सुडानमा सशस्त्र प्रहरी बल (एसएएफ) र आरएसएफबीचको संघर्ष सन् २०२३ को अप्रिल १५ देखि जारी छ। एलफशरमा मात्र गएको मे १० तारिखदेखि यी दुई पक्षबीच ठूला झडपहरू भएका छन्। यो संघर्षका कारण हालसम्म १६ हजार ६ सय ५० जनाको ज्यान गइसकेको छ।
संयुक्त राष्ट्रसङ्घको तथ्याङ्कअनुसार, सुडानमा अहिले एक करोड सात लाख जना मानिस आन्तरिक रूपमा विस्थापित भएका छन् भने २२ लाख जना मानिसले छिमेकी देशहरूमा शरण खोजिरहेका छन्।
यो आक्रमणले सुडानको स्थितिलाई थप गम्भीर बनाएको छ, र यो संकटको अन्त्यका लागि अन्तर्राष्ट्रिय समुदायले तत्काल कदम चाल्नुपर्ने आवश्यकता देखिएको छ।
